श्रेयवादात वाहतंय पुलाखालून पाणी
गेली दोन महिने बीड मधील रहदारी हा मोठा पेच म्हणून समोर आला अन दोन बळी घेऊन देखील बसला. यापुढेही शहरातील वाहतूक मोंढामार्गे वळवून त्या परिसरातील नागरिकांनाहि याचाच त्रास सहन करावा लागला आहे. सगळा उन्हाळा गेला तरी या पुलाबाबत कोणीही लोकप्रतिनिधीने कसलीच हालचाल केली नाही. जेव्हा पहिल्या पावसात पर्यायी बनवलेला पूल वाहून गेला तेव्हा शहरातील या प्रश्नाची कणव सगळ्यांनाच आली. पूर्ण उन्हाळ्यात जिल्ह्यातील लोकप्रतिनिधी काय झोपा काढत होते का? पर्यायी रस्ता पावसाळ्यात कुचकामी ठरणार आहे माहित असतानादेखील सत्ताधाऱ्यांकडून यावर सपशेल मौन बाळगण्यात आले. चालू आहे वाहतूक म्हणून प्रवाशांनीही दाखल घेतली नाही मात्र १२ जूनच्या पावसात पुलाच्या वरून बिंदुसरा खळाळली तेव्हा मात्र सर्वांना पुलाची जाण आली. या मतदारसंघाचे आमदार हे काही वर्षांपूर्वी सार्वजनिक बांधकाम विभागाचे मंत्री होते त्या काळातही या निजामकालीन दुरुस्तीला त्यांनी एवढे महत्व दिले नाही. मात्र आता भाजपच्या सत्तेच्या काळात केंद्राकडून थेट कामाला सुरुवात करा म्हणून फर्मान निघते तेव्हा त्यांच्या २ वर्षांच्या पाठपुराव्याला यश आल्याचे प्रसिद्धीपत्रक वर्तमानपत्रात छापून येते. याच पाठपुराव्यातून हे काम झाले असेल तर मुंडे भगिनींनी कशाचा पाठपुरावा केला आहे? आणि त्यांच्याकडूनही अगदी तशाच प्रकारचे पाठपुराव्याची पत्रक कसे काय निघाले? श्रेयवादात शहरवासीयांच्या सहनशीलतेचा अंत सरकार कधीपर्यंत पाहणार आहे?
 |
| पर्यायी रस्त्याच्या उदघाटनप्रसंगी उपस्थित मान्यवर! |
जर पत्रक एकसमान निघत असेल तर ते सयुंकरित्या काढायचे! यातून नेमका पाठपुरावा कोणी केला हे तरी जनतेला स्पष्ठ होऊंद्या. आणि आज जे थेट कामाचे फर्मान निघाले आहे यातून चारपदरी पूल होणार आहे ते उत्तम आहे याबद्दल अभिनंदन मात्र शहरवासीयांचे आणि या बीड शहरातून प्रवास करणाऱ्या प्रवाशांचे जे हाल यापूर्वी या अडगळीत ठेवण्यात आलेल्या पुलामुळे झाले याला जबाबदार कोण आहे? एवढा मोठा राष्ट्रीय महामार्ग आणि २०० मीटरच्या पुलामुळे सदा वळवण्यात येतो ते सत्ताधाऱ्यांना कितपत योग्य वाटत होते? आधीच शहर भकास, स्वछता म्हणून किंवा पर्यटन म्हणून काडीची किंमत नसताना पुलामुळे बीड शहर नको रे बाबा म्हणायची वेळ प्रवाशांवर आणण्यास आजघडीला जबाबदार कोण आहे?
धनंजय गुंदेकर - 9689043949
Comments
Post a Comment